العمل فى المراكب السياحية النيليه

السلام عليكم
هذة التدوينة تشرح العمل فى المراكب السياحة النيليه

1- لا بد ان يكون المهندس خريج احدى الجامعات المصرية او المعاهد المقيدة فى نقابة المهندسين
2- ان يكون قام بانها الموقف التجنيدى

الاوراق المطلوبة لاستخراج رخصة مهندس للعمل فى البواخر النيلية
1- شهادة باطنة و نظر   ( بتضربها من اى مكتب صحة و بياخد عليها 75 جنية (او انتا و شطارتك))
2- اصل و صورة شهادة التجنيد
3- اصل و صورة المؤهل الدراسى
4- 6 صور شخصية ( للاحتياط علشان الرخصة لابد ان يكون بها صورتك)
5- صورة البطاقة الشخصية
6- اصل و صورة شهادة الميلاد

و تطلع بعد كدة على مبنى الملاحة النهرية فى اى من
1- اسوان طريق الكورنيش امام مصنع الكوكاكولا
2-العنوان الخاص بها فى القاهرة ممكن تجيبة من الدليل 140 - و للعلم هو فى مصر القديمة

الرخصة يتم استخراجها خلال يومين على الاكثر
     -------------------------------------------------
استخرجت الرخصة طيب بعد كدة حتعمل بيها اية ؟
للعلم جميع المراكب السياحية فى النيل لابد من وجود بها مجموعة من الرخص و ذلك لازم لمنحها ترخيص بالعمل و من هذة الرخص ( رخصة مهندس - رخصة ميكانيكى اول - تقريبا 3  رخصة مساعد ميكانيكى - رخصة كهربائى و كهربائى اول )
المرتب للمهندس حديث التخرج تقريبا الادنى 1500 الى 2500 كل شركة و نظامها بالاضافة الى التبس - مبلغ يقوم السائح بتركة كشكر للعاملين فى الباخرة فى نهاية الرحلة و يتم جمعة و تقسيمة بين الادارات باسلوب معين و يقوم كل مدير قسم بتقسيمة بين العاملين فى ادارتة حسب النسب المتعارف عليها - و ايضا هناك 12% و هى نسبة من مشروبات السائح التى تشمل ( الخمور و الخمور و الخمور و بعد ذلك باقى المشروبات و ايضا يتم اضافتها على المرتب للعامل
يعنى بالعربى من الممكن اجمالى ما يتحصل علية المهندس لو السياحة شغاله 2500 الى 3500 او اكثر حسب الشركة
-------------------------------------------------
المهام المطلوبة من المهندس فى الباخرة
هو المسئول عن صيانة كل شىء فى الباخرة من ( ماكينات - غلايات - مولدات - انظمة التبريد - بدن الباخرة - الاخشاب - المطبخ و جميع الاجهزة بة )
يعنى حينتحر و هو ميعرفش اى حاجة فى الحاجات دى
--------
متقلقش يا عم من الاخر وظيفة المهندس شرفية فى معظم البواخر يعنى المطلوب من المهندس الرخصة فقط و جميع المهام يقوم بها باقى اعضاء القسم و لكن هناك بعض الشركات التى يوجد بها نظام يقوم فيها المهندس بدور حقيقى و يكون مسئولا عن ادارة القسم و من هذة الشركات ( شركة ترافكو - اكستنشن جروب - موفنبيك - ابركرومبى )
فهذة يعتبر مدرسة فى الادارة للمهندسين و لكن المشكله فى هذة الوظيفة يقوم المهندس بالدور الادارى اكثر من الفنى مما يؤثر على خبرتة الفنية مع الوقت
--------------------------------------------------
اهم حاجة تتفاوض كويس على مميزات الراتب و باقى المميزات منها ( هل لك غرفة منفصله ام ستشارك احدهم فى الغرفة - و ما هى سلطة مدير الباخرة عليك - و ما هو الاعتماد المالى الاسبوعى المخصص للصيانة - و اسلوب التعامل مع المحاسب هل سيكون مسئولا عن المشتريات ام ستكون انت مسئولا عنها ( يفضل ان تكون بعيد عن المشتروات (علشان بيبقى فيها عمولات و سمسرة)
و مسئوليتك عن اعضاء قسم الصيانة ( حاول ان تحتويهم بقدر الامكان لان معظم اعضاء قسم الصيانة يظنوا ان المهندس ليس له فائدة الا الرخصة لذلك سيكون من الصعب السيطرة عليهم فى البداية و لكن كن سياسيا معهم )

و ربنا يوفقك